• Նորություններ
• Հղումներ
• Գործընկերներ
• Կայքի Քարտեզ

 Եղնիկներ պարտիզանական ջոկատ: Կազմավորվել է 1992-ի հունիսի 25-ին՝ Շահումյանի անկումից հետո, Հաթերք գյուղում՝ շրջանի գյուղերի ինքնապաշտպանական ջոկատների հիմքի վրա: Ունեցել է շտաբ, դրոշ և զինանշան, որը Գյուլիստանի մելիքների զինանշանն էր: 1993-ի մարտից Եղնիկների հիմքի վրա ստեղծվել է Շահեն Մեղրյանի անվան հատուկ ջոկատը:

 1992-1994-ին ջոկատը տեղաբաշխվել է ԼՂՀ անտառներում և պարբերաբար հարվածներ հասցրել հակառակորդին Շահումյանի (Վերինշեն, Գյուլիստան, Շահումյան, Խարխափուտ) և Մարտակերտի (Դաստագիր, Մադաղիս, Տոնաշեն, Մաղավուզ, Ականաբերդ, Հաթերք) շրջանների տարածքում, մասնակցել Սարսանգի հիդրոհանգույցի ազատագրական մարտերին: 1992-ի ամռանն իր գործողություններով կանխել է ադրբեջանական Գերանբոյի գնդի առաջխաղացումը Մարտակերտի շրջան: Մարտերի ընթացքում հակառակորդին պատճառել է ռազմական տեխնիկայի և կենդանի ուժի մեծ կորուստներ:

 Հրամանատար՝ Շ. Մեղրյան, շտաբի պետ՝ Ս. Չալյան, Շ. Մեղրյանի զոհվելուց հետո (1993) մարտական գործողությունները ղեկավարել են Հ. Խդրյանը, Շ. Հովասափյանը («Կուճուր Շահեն»), Ա. Կուրեպինը և Պ. Մեղրյանը: Ջոկատից զոհվել է 27 ազատամարտիկ:

Պ. Մեղրյան

Գրականություն

Ղարաբաղյան ազատագրական պատերազմ 1988-1994 թթ. հանրագիտարան, Երևան, 2004 թ.